Aires da miña Terra: PortuGaliza

Guía dos castros Galaicoportugueses

Tue, 13 Feb 2007 19:22:56 GMT

Cultura publica a primeira guía de castros que abrangue Galiza e Portugal

A Consellería de Cultura e Deporte publicou a Guía de castros de Galiza e noroeste de Portugal, a primeira que abrangue construcións das dúas beiras do Miño. A publicación xa advirte de que non pretende ser a máis completa cás que xa existen, senón amosar a unidade cultural do territorio castrexo hai dous mil anos por riba das actuais fronteiras administrativas.

Na guía aparecen datos e imaxes dos 45 castros máis senlleiros e mellor conservados: 5 da Coruña, 5 de Lugo, 4 de Ourense, 6 de Pontevedra, 8 de Viana, 8 de Braga, 6 do Porto e 3 de Vila Real. Publicáronse 750 exemplares do libro, de 98 páxinas, que tamén se pode descarregar libremente da web da consellaría en formato PDF, en galego ou en inglés.

O traballo forma parte do proxecto Castrenor, no que participan a Xunta, Adrave, a Universidade do Minho e a cámara municipal de Monção, e que ten como obxectivo promover o coñecemento dos elementos comúns da cultura castrexa entre Galiza e Portugal e fomentar o seu desenvolvemento turístico. Estivo financiado polo programa europeo Interreg IIIA ao que se sumou a Consellería de Cultura a través da súa Dirección Xeral de Patrimonio Cultural.

Ponte... nas ondas!

Thu, 08 Feb 2007 16:14:50 GMT

De novo, téndese unha ponte nas ondas... e na rede

Xa van alá doce anos dende que tivo lugar a primeira experiencia deste tipo. Agora, Ponte... nas ondas!, convoca a XIII edición da xornada de radio interescolar para o 1 de xuño. Ademais, este ano a ponte percorrerá as ondas e máis a rede: internet vai ser praza, espazo de intercambio, feira do patrimonio. O fío condutor segue a ser a cultura galego-portuguesa. A Asociación continúa co traballo que comezou a desenvolverse en 2002 sobre o Patrimonio Inmaterial Galego-Portugués. Demandan a integración deste patrimonio no sistema educativo de Galiza e do Norte de Portugal.

Todos os centros escolares están convidados a tecer "mallas invisíbeis que atrapen nelas as voces nas que a nosa se cultura común se expresa. A riqueza do patrimonio inmaterial é o tema no que enredar: as tradicións tráense á modernidade por medio das ondas, e este ano tamén da rede. Esta edición pretende tecer a primeira rede virtual do patrimonio inmaterial galego-portugués, de cara ás novas xeracións.

Poden participar todos os centros públicos de ensino de Galiza e de Portugal de todos os niveis (Ensino Infantil, Primario, Secundario, Profesional e Universitario), con programas de duración máxima de 20 minutos, ou, se é un programa conxunto entre centros, 35 minutos. Tamén poden participar centros do ámbito lingüístico da lusofonía e da rede AIRE (Asociación Internacional de Radios Educativas ) xunto con centros de outros países de América e de África.

Os programas serán gravados e enviaranse por correo ordinario ou electrónico en calquera dos formatos dixitais (MP3, WAW) e en calquera soporte (cedé, correo electrónico, minidisc, etc. ), antes do 30 de abril. Pero antes cómpre formalizar a inscrición, cubrindo e enviando a ficha de participación antes do 16 de marzo. Haberá agasallos para todos os centros participantes e premios especiais para os programas conxuntos entre centros galegos e portugueses ( ou do ámbito da lusofonía ).

O gran día

E o día da emisión de Ponte... nas ondas!, farase sobre todo a través de internet, aínda que a xornada comezará nos estudos das emisoras de radio, dende as 10.00. Unha vez rematada a a xornada, poderemos escoitala en www.pontenasondas.org en formato Pod Cast.
Segundo vaian sendo recibidos os programas, irase elaborando unha grella coa programación que estará visíbel na web desde comezos de maio. E xa durante a emisión realizaranse diversos concursos a través da web, lanzando actividades para a participación interactiva, manteranse varias salas de chat e un foro de participación.

Unión aérea luso-galaica

Sat, 13 Jan 2007 01:15:23 GMT

O aeroporto do Porto trata de captar clientes galegos

O aeroporto do Porto acaba de dar un paso máis no seu obxectivo de captar clientes en Galiza e seguir sumando usuarios para achegarse ao seu obxectivo de contar cuns 12 millóns de pasaxeiros na vindeira década. Nesa incesábel procura de novos mercados, a dirección da terminal lusa acadou unha alianza cunha compañía de autobuses de Vigo, para facilitar aos pasaxeiros de Galiza o acceso ao Sá Carneiro.

Froito de devandito acordo, até cinco autobuses enlazarán cada día Vigo co aeroporto do norte de Portugal e viceversa, co que as ofertas de dita terminal achéganse máis e de forma máis cómoda aos usuarios do transporte aéreo en Galiza, tal e como pretende Autna, sociedade pública que xestiona os aeroportos do país veciño. Comodidade fronte a proximidade é a filosofía coa que a dirección do Sá Carneiro pretende "roubar" usuarios aos aeroportos da Galiza.

O dobre de usuarios

Dende o 2002 un bus de Autna xa enlazaba ámbalas cidades da eurorrexión de PortuGaliza, pero cunha única frecuencia diaria. Trinta galegos utilizaban dito servizo até agora, pero dende o 18 de decembro, aeroporto e empresa de autobuses realizaron unha serie de probas trá-las que ámbalas sociedades se decidiron a multiplicar por cinco a oferta. En menos dun mes duplicouse o número de pasaxeiros que toman en Vigo dito autobús para achegarse até O Porto no canto de usá-lo aeroporto vigués de Peinador.

Os responsábeis do Sá Carneiro e de Autna estiman que unha vez que se publicite dita liña e os seus horarios, medrará moito máis o nivel de ocupación do autobús que cada dúas horas parte de Vigo.

Autna non considera que coa súa alianza co aeroporto luso estea traizoando a posibilidade de desenvolvemento de Peinador, terminal situada a un par de minutos da central da firma de autobuses. «Se de verdade cremos na eurorrexión, temos que sumar esforzos e unhas veces gañarán uns e outras pois outros, é unha cuestión de ver máis aló de cuestións localistas», sinala un portavoz da empresa de transportes galega. A súa iniciativa é até aplaudida polo Padroado de Turismo Rías Baixas, xa que, segundo asegura o interlocutor de Autna, o organismo de promoción da Deputación de Pontevedra estima que os turistas que cheguen ao Porto terán máis doado desprazarse e coñecé-lo sur de Galiza.

O localismo e a competencia mal entendida é o que a dirección de Autna cre que imposibilitou que a nova liña de autobuses entre Vigo e O Porto se poida publicitar na contorna do aeroporto de Lavacolla. «Impedíronnos colocar os nosos valos alí no chan que controla AENA», asegura o portavoz de Autna, que con todo saúda aos usuarios de Peinador cun enorme cartel cando entran no aeroporto.

Salga vip para galegos

Pero a intención de mellorar o trato aos clientes de Galiza por parte da dirección aeroportuaria lusa non queda só en pór un transporte frecuente e rápido, que ademais custa só 18 euros ida e volta. Unha sala VIP de uso exclusivo para pasaxeiros galegos acaba de ser aberta no Sá Carneiro para facer máis acolledoras as esperas aos que chegan da outra beira do Miño.

Xornais galegos, a TVG nas pantallas de fondo e outras vías de informazón sobre a terra de orixe, ademais doutras atenzóns, son postas a dispor por parte do aeroporto aos clientes de Galiza nun espazo reservado só para eles, co que Autna pretende recalcá-la importancia que lle outorga ao mercado galego, chegue en bus ou polos seus medios.

Crise automovilística en PortuGaliza

Fri, 29 Dec 2006 11:27:25 GMT

Citröen cavila suprimir a fábrica portuguesa de Mangualde

Coa contorna da comarca viguesa aínda axitada pola marcha de Xavier Riera da dirección xeral da empresa en Galiza e as incógnitas sobre o impacto en Vigo dos cambios que afronta o xigante automobilístico, chegan malas novas do outro lado do Miño sobre a empresa. O posíbel peche da factoría de Peugeot-Citröen en Mangualde, avanzado polo Diario Económico, causaría a perda de 1.400 traballos directos e máis de cinco mil indirectos.

Segundo o xornal portugués, a dirección de Citröen avisou de que a posibilidade de que a empresa marche do país "é real". Paradoxalmente, o motivo principal argumentado serían as dificultades para facerse con terreos para ampliar a fábrica portuguesa, que fora creada en 1964 como apoio á factoría galega.

Os propietarios dos predios que pretende adquirir Citröen, un espazo de 80 mil metros cadrados, piden 12 millóns de euros por eles, cantidade que a empresa non está disposta a pagar. No conflito median o Concello de Mangualde, responsábeis da Agência Portuguesa para o Investimento e o secretário de Estado da Economia e Inovação, Castro Guerra, polo momento sen éxito. Citröen considera imprescindíbel a ampliación para afrontar a produción do vindeiro modelo do grupo.

Podedes ampliar información no Diario Económico.

Patrimonio inmaterial Galego-Portugués

Sat, 23 Dec 2006 13:36:45 GMT

Cultura tradicional e desenvolvemento rural: o noso patrimonio

O libro naceu en paralelo á candidatura do Patrimonio Inmaterial Galego Portugués como Obra Mestra da Humanidade da UNESCO. Nela vencella a cultura tradicional e o medio rural de Galiza e Portugal. O director xeral de Desenvolvemento Rural e conselleiro delegado da SA para o Desenvolvemento Comarcal de Galiza, Edelmiro López Iglesias, presidiu en Compostela a presentación oficial: a obra reúne, ao longo de 300 páxinas, un total de 62 artigos de autores como Xosé Luís Méndez Ferrín, Suso de Toro, Santiago Veloso, Pinto de Herbón, Antón Patiño ou Xosé C. Sierras, entre outros, arredor de temas como a música tradicional, a olaría, as embarcacións fluviais, a conservación da agricultura tradicional, ou o entroido.

Precisamente, o fío conductor deste libro naceu a partir da candidatura do Patrimonio Inmaterial Galego Portugués como Obra Mestra da Humanidade da Unesco. Ao longo de catro anos a escolas, concellos, asociacións, portadores e diversas institucións galegas e portuguesas (CCG, Eixo Atlántico, UVI, USC, AGADER, MPG, as consellarías de Cultura, Educación, Innovación e Industria...) traballaron a prol do recoñecemento deste patrimonio inmaterial. Xavier Simón, un dos promotores da iniciativa, defendeu a necesidade de pór en marcha un plan de salvagarda que garanta a continuidade deste patrimonio e resaltou a estreita relación que mantén co desenvolvemento rural. Salientou sobre todo a tendencia de "frear a tendencia ao abandono poboacional, económico e ambiental do rural galego".

Pola súa banda Iván Area, vicerreitor de Relacións Institucionais da Universidade de Vigo, lembrou as cinco áreas de coñecemento que abarca o patrimonio inmaterial galego portugués: as tradicións e expresións culturais –incluído o idioma como vehículo do patrimonio cultural-; as artes do espectáculo; os usos sociais, rituais e actos festivos; os coñecementos e usos relacionados coa natureza e o universo e as técnicas artesanais tradicionais. Area amosou o desexo da Universidade de Vigo de que "o interese que se suscitou en 2005 polo Patrimonio Inmaterial co feito da candidatura continúe durante anos con traballos de investigación e de divulgación, como a obra que hoxe presentamos".

Por último, o director xeral de Desenvolvemento Rural, Edelmiro López destacou que "para a Consellaría do Medio Rural falar Patrimonio Inmaterial non é falar de pasado, senón sobre todo de futuro". Subliñou as posibilidades económicas e de emprego do mundo rural, e a necesidade de prestixialo de novo como un valor de futuro.

Velaquí a promoción que se fixo á candidatura: http://www.youtube.com/watch?v=gxVmiJa_kTw

Unha nova vía de unión galaico-portuguesa

Sat, 25 Nov 2006 13:49:16 GMT

A quinta ponte con Portugal

Galiza e Portugal terán unha nova vía de comunicación. O Goberno aprobou onte o proxecto para a construción dunha ponte sobre o río Támega entre as localidades de Feces de Abaixo (Ourense) e Vila Verde da Raia (Portugal). O novo viaduto será o quinto que unirá localidades galegas con pobos lusos e sumarase aos xa existentes entre Tui e Valença do Miño; Salvaterra e Monçao; Arbo e Melgaço; e Goián e Vilanova de Cerveira.

O proxecto de unir Feces de Abaixo e Vila Verde da Raia é antigo e parte do Convenio entre o Reino de España e a República Portuguesa realizado en Madrid o 24 de xuño de 1997. O Consello de Ministros recibiu onte finalmente o proxecto da comisión técnica mixta instituida no artigo 5 dese convenio para a construción da nova ponte. A finalidade do viaduto é mellorar as comunicacións terrestres entre os dous países e, máis en concreto, a circulación de vehículos e de persoas.

O artigo 3 do convenio hispano luso prevía que a redacción do proxecto sería encomendada a un dos dous Gobernos e finalmente o labor recaeu no Executivo español. Foi en abril do 2005 cando, a través da comisión técnica hispano-portuguesa examinouse e aprobou o proxecto en Madrid. Onte, o Executivo aprobou ese plan. Xa só falta que o Goberno de Portugal envíe ao español a súa nota de resposta á comisión técnica, dando eventualmente a súa aprobación, para dar paso á seguinte fase do proceso, que comprende a licitación e execución das obras.

Malia que cando o viaduto estea rematado haberá xa cinco pontes que unan Portugal e Galicia, o ansia de comunicación entre os habitantes de ámbolos países non estará satisfeito. Os representantes do Eixo Atlántico, unha asociación transfronteiriza de municipios integrada polas 18 cidades do Norte de Portugal e de Galiza que configuran o sistema urbano dunha eurorrexión, queren máis. Entre as reivindicacións históricas desta asociación figura a de facilitar a libre circulación de mercadorías e de persoas entre ambámbalas rexións. E para iso propón a construción doutras dúas pasarelas sobre o Miño. Os próximos candidatos a unirse ás pontes xa existentes e ao aprobado onte serían os que unan as localidades da Guarda e Camiña, e as de Verín e Chaves.