Aires da miña Terra: Festas

Comeza o Entroido!!!!!

Sat, 27 Jan 2007 12:53:46 GMT

Arrinca en Xinzo a celebración do entroido

As celebracións máis tradizonais do entroido na Galiza concentraranse na provincia de Ourense durante as vindeiras semanas e iniciaranse mañá, día 28, en Xinzo de Limia co Domingo Fareleiro no que os veciños se enfrontan nunha batalla de case unha tonelada de fariña.

O Entroido continuará en Xinzo de Limia con diferentes celebracións cada domingo até chegar ao día 18 de febreiro no que se festexa o Domingo de Entroido coa primeira saída das personaxes que protagonizan esta época do ano na localidade, as Pantallas.

Así, entre o Domingo fareleiro e o Domingo de Entroido, os veciños de Xinzo participarán o domingo día 4 de febreiro do Domingo Oleiro, un xogo de lanzamento de olas de barro e o domingo día 11 de febreiro será o Domingo Corredoiro, coas primeiras saídas de música e disfraces pero os días grandes serán o domingo día 18 e o martes día 20 de febreiro, protagonizados polas Pantallas.

O martes de Entroido en Xinzo, como en case toda a provincia, centrarase nun desfile no que se mesturan cada ano disfraces individuais e coletivos, comparsas, carrozas multicolores e as personaxes tradizonais propias de cada zona.

A celebración do Entroido seguirá en Xinzo coa celebración do Enterro da Sardiña o día 21 de febreiro e rematará o domingo día 25 coa Piñata, pechando así o ciclo de entroido máis longo da Galiza.

Até que chegue o intre de sacar á rúa as Pantallas -o Domingo de Entroido- unha decea de veciños elaboura a súa máscara nun taller impartido polo panadeiro de Xinzo, Celso Lorenzo que nas súas horas libres confeciona Pantallas e ensina a outros a facelas "tal como me ensinou un familiar cando eu tiña 18 e dende entón fago 30 cada ano e agora teño 52 anos".

Cada veciño que se viste de Pantalla, segundo explicou o monitor de máscaras, non só vai disfrazado coa roupa tradizonal da personaxe "senón que asume o seu comportamento que debe ser totalmente respectuoso co papel que lle corresponde de impor autoridade axudado do son das campanillas que leva na faixa e das vejigas cheas de aire que bate coas mans».

No resto da provincia prepáranse tamén os traxes e máscaras correspondentes a outros personaxes do Entroido ourensán, os Peliqueiros de Laza, os Cigarróns de Verín, os Felos de Maceda, Maside, Boborás e outros, en Viana do Bolo e Vilariño de Conso Boteiros e Folións e en Bande os Troteiros.

O primeiro día para ver a estas personaxes varía segundo as zonas, e tamén é diferente o día grande do Entroido, segundo o municipio, malia que varios centran esta celebración en senllos desfiles o domingo de Entroido día 18 de febreiro e o martes día 20.

Festa Nacional en Riazor

Fri, 29 Dec 2006 11:57:18 GMT

"Unha nación, unha selección"

Así o subliñaba un dos primeiros cartaces en debuxar as bancadas este xoves. Fervían os banzos e prometía festa a noite en Riazor. O son do contorno ía sumando decibelios cando apenas o medio milleiro de siareiros máis madrugador buscara asento e ducias agardaban quenda a pé de taquilla para apañar entrada de última hora. Do Orzán a Riazor, a noite herculina deste xoves enchoupou coas cores de Galiza mentres se aproximaban os berros dos afeccionados cara ao estadio prognosticando a vitoria da nosa selección esta noite. Malia a fin quedar o desafío en empate, soubo a vitoria o ambiente conseguido.

Non se escatimaron gorxas e as mans bateron forte espantando o pouco frío que puidese asomar en Riazor. Ao tempo que coa noite baixaban as temperaturas no termómetro, chimpaban para arriba as temperaturas do escenario. Dende a Praza da Leña carretaron ánimos os afeccionados até Riazor. Grandes animadores da noite, os Siareiros Galegos foron quen de convocar en hora punta e na outra beira da cidade a centos de seguidores da nosa selección, poñendo novas cores no Nadal herculino de camiño á cita futboleira.

Na segunda cita, coa forza da primeira
Sentiuse a enerxía liberada en canto o balón comezou a rodar e altas doses de adrenalina convertidas en apupos no primeiro parón do partido, con falta a Nano aos poucos segundos do inicio. As bancadas pedían xogo: máximo de minutos co balón rodando a festa. Atrás da porta ecuatoriana no primeiro tempo tocoulles asento aos máis rebuldeiros seareiros. Coa porta facendo imán ao berro de Galiza! Galiza! chegaban os primeiros disparos a lamber o longueiro de Ecuador.

"Pantón coa selección", "Unha grande e chea", de Cambados, a federación de peñas do Deportivo da Coruña, Paradela, Antas de Ulla, ou o Bierzo... decoraron os afeccionados deixando pegada por riba do campo, até encher arredor das tres cuartas partes de Riazor, por riba da media de espectadores do estadio no que vai de tempada.

Banda sonora doutra noite histórica para o noso fútbol
Os siareiros queceron a noite con moita cantiga e constantes boureos de tambores. Moita xente moza nas bancadas: siareiros de hoxe e tamén de mañá, dos partidos que veñen, especulando cos próximos rivais a desafíar noutros campos galegos. Soaron os acordes da "Rianxeira" e cantouse o "miudiño". E malia o importante despregue policial os incidentes foron fabas contadas, apenas algún foguete acendido entre as bancadas que rematou no regato a pé de campo. O encontro foi diante de todo unha festa, a oportunidade de amosar publicamente "un sentimento", como resumiría o adestrador Vázquez á beira do adestrador Arsenio, ao rematar o encontro, "se a xente segue empuxando así, haberá selección por moito tempo", dixo Vázquez. E subliñou Arsenio, "animaron moito: moito".

Outro partido gañado tamén nas bancadas
Se cadra, moitos siareiros non atinaban co nome do xogador que corría a fume de carozo cara a meta ecuatoriana pero cada vez que isto acontecía as bancadas erguían empurradas por milleiros de voces sincronizadas. Os paradoxos do país teñen estas cousas: as estrelas do fútbol galego agasallan calidade en campos de fóra. Exemplo foron os ánimos e o recoñecemento a Viqueira, a quen o Deportivo deixou escapar hai tempo, para velo agora triunfar con outras cores. Alén doutros méritos desta cita de Galiza coa súa selección, tamén destacou esa posibilidade para os profesionais galegos de demostraren a súa valía. Aprendeu a nosa selección unha experiencia novidosa: xogar co marcador en contra. E superou con nota o reto dobre, no campo e nos bancos. O público concedeu confianza e regalou ánimos. E as destemidas arremetidas dos protagonistas cumpriron coas expectativas. Co reloxio fóra de hora, a grada non gañaba acougo. Cheirábase a remontada, pero finalmente non houbo tempo abondo.

Terceiro tempo
A Coruña comezara a ser un fervedoiro unha hora antes do encontro. As principais arterias de entrada á cidade, ateigadas de coches, e ao intenso tráfico que soporta a diario sumábanse numerosos vehículos que chegaban de todos os currunchos do país. O destino non era outro que o estadio de Riazor. A pé do Orzán o ruxir do Atlántico axiña deixou paso a outras pezas dos siareiros. Polos numerosos bares que rodean o campo herculino comezaron a verse as tropas galaicas dando conta de xenerosas xerras de cervexa e viandas do país. Tempo xusto para coller forzas para a seguinte expedición da noite: á beira do estadio quentaran instrumentos os grupos aos que lle tocaba poñerlle a banda sonora ao terceiro tempo. Un concerto que pecharía Siniestro Total en coincidencia de intereses co entregado público que encheu o Pazo dos Deportes de Riazor, tema escollido: "Miña Terra Galega".

E toda a noite, nas rúas, o berro máis escoitado: "Unha nación, unha selección", ou abreviando, sinxelamente: "Galiza!".

O Courel, antes do feísmo

Sat, 09 Dec 2006 15:21:17 GMT

Festa da Pisa da Castaña

Centos de persoas asisitiron onte en Froxán, unha aldea da serra do Courel, á Festa da Pisa da Castaña, que este ano chega á súa oitava edición. Este festexo consiste principalmente nunha recreación da laboura tradicional da preparación das castañas secas, habitual na zona até mediados do século pasado. A pisa lévase a cabo metendo nun saco as castañas -secadas previamente con lume e fume nos típicos sequeiros- e golpeándoas contra un tronco. Os froitos sacódense logo nunha bandexa chamada bandoxo e o que se logra con todo elo é deixalos en condicións de seren conservados e consumidos.

A edición de onte foi moi especial, non só polo feito de que a festa atraése a máis visitantes que outros anos e de que as primeiras neves da tempada adornasen ao lonxe os cumios do Courel. O día anterior, a Xunta anuncióu que o pobo de Froxán -o seu lugar de celebración habitual- remata de seren declarado Ben de Interese Cultural (BIC) coa calificación de lugar de interese etnográfico. Un recoñecemento merecido para un lugar que conserva como poucos a arquitectura popular e a fisonomía característica das poboacións orientais galegas.

Sita nos cons do río Lor, Froxán foi sometida na decada dos noventa a un plan de restauración financiado con fondos europeos. Pasear polas súas rúas, entre venerábeis vivendas de muros de lousa, balcóns de madeira, sequeiros de castañas, eiras e outros elemento típicos da arquitectura popular, supón retornar a uns tempos moi antergos á era do feísmo urbanístico. Malia o seu atractivo aspecto, sofre o tremendo baixón demográfico que afecta a toda a zona dende fai décadas e ten un reducido número de veciños. Agora Froxán é a segunda aldea de O Courel coa categoría de BIC; a outra é Seceda, declarada como tal no 1997. Mais falla aínda que estos lugares se convertan nun modelo, non só de conservación do patrimonio arquitectónico, senón tamén da recuperación da economía e demografía da montaña galega.

De concerto

Wed, 06 Dec 2006 18:48:43 GMT

Lume pra que saia o sol!!!

Boas xente! Onte fun ao concerto que deron Lamatumbá en Compostela có gallo da festa do voluntariado galego a prol dos nosos montes.

Curiosa fusión cando que o berro de guerra deste grupo ourensán é precisamente: Lume!!

O concerto foi a hostia, como os outros aos que fun no meu pobo, As Pontes, e en Lugo polo San Froilán. Sempre en primeira fila e liándoa, hehe. Coido que son coma da casa pra eles XD

Se algún ou algunha de vós anda perdido e aínda non coñece a este grandísimo grupo pódese descarregar da súa páxina algunhas das súas cantigas: http://www.lamatumba.com/?p=175&lang_view=gl

Grandes, grandísimos Lamatumbá!!!

P.D.- Logo trunfei toda a noite co suadoiro da Santa Companha dos Aduaneiros e a camisola de Mexan POR NÓS e temos que dicir que chove :D

Racha coas túas cadeas,

enche de lume as túas veas!

LUME!!!

Por un Nadal menos consumista

Fri, 24 Nov 2006 22:36:33 GMT

O Nadal incrementará os residuos en Galiza entre 50 e 75 %

A Asociación para a Defensa Ecolóxica de Galiza, Adega, anunciou unha campaña para o Nadal, época en que se incrementan os residuos en entre un 50 e un 75 %.

Os ecoloxistas sinalan nun comunicado que «o Nadal é na actualidade a máxima expresión do consumismo dunha sociedade opulenta, despilfarradora e insolidaria co planeta e cos seres que o habitan».

Nesta época xérase un gasto enerxético superior ao do resto do ano, así como un maior consumo de produtos e produción de residuos, o que se traduce, «sen que a maioría da sociedade o perciba, nunha maior depredación dos limitados recursos do planeta», resalta Adega.

A asociación explica que «cada un ten as súas responsabilidades» e que a administración debe producir normativas serias que reduzan o malgasto enerxético, ordenanzas rigorosas de residuos e que se impida que a publicidade masiva chegue a quen non a solicitou.

Entre outras propostas, recomenda reutilizá-lo papel de agasallo, pactá-lo intercambio de agasallos, para non ter cousas innecesarias e inútiles, e empregar obxectos sen pilas ou que sexan recargábeis.

Na mesa, propón que «a túa barriga non devore o planeta», sinala que moitos dos produtos proceden de monocultivos ou explotacións antiecológicas e pide que se favoreza o comercio xusto.

Cando se vaia mercar, Adega lembra que se debe evitar a profusión de embalaxes, bolsas, lazos e etiquetas, que os animais non son xoguetes, senón seres vivos, e pregúntase se precisamos dun móbil novo ou o precisa a compañía que os vende.

Finalmente, os ecoloxistas piden que se use menos o coche para ir de compras e que nas festas non se empreguen vasos, pratos e outros elementos de usar e tirar, pois «se non sobra nada, mellor».

Xuntanza de blogueir*s

Mon, 30 Oct 2006 09:08:15 GMT

Reunión para tomar unhas cañas

Boas xente! Expoño eiquí a proposta que me fixo unha blogueira, Feiticeira Escura, para nos reunir un día pra parolar e tomar algo os que estamos a estudar en Compostela e temos os blogs escritos en galego.

Os que acostumades a pasarvos por aquí podedes poñer nos comentarios unha proposta de día, hora e lugar. Persoalmente penso que estaría ben, por exemplo, un mércores; quedar nun sitio e ir a tomar uns licorcafés á Casa das Crechas, non?

Vos propoñede o que queirades, e a ver se chegamos a acordo.

P.D.- Eu diría mesmo de facer festa na miña casa, pero á primeira que fixen, á que xa convidei a Adán (Galiza Livre), malia que non foi, xa foi a policía... así que mellor agardar unha tempadiña pra facer outra, hehe.

Festa de inaugurazón do piso

Sat, 14 Oct 2006 11:20:20 GMT

Festa en Casa Kit

Este vindeiro xoves vai haber a primeira festa no meu piso. O de Casa Kit ven a que por Compostela a meirande parte da xente me coñece como Kit no canto de Suso XDDD

Os que acostumades a pasarvos por eiquí xa sabedes que estades invitados, só tendes que poñervos en contacto comigo pra confirmarme a vosa presenza. É a historia de sempre... eu poño os vasos, o xeo, o piso e a música e vós a vosa bebida e as ganas de festa.

Recoméndovos que veñades, porque vai ser bastante espectacular... veredes o nunca visto XDD O meu compañeiro de piso castelán está a aprender galego e vai facer para clase un traballo sobre o nacionalismo galego. E vai ir o meu "primo" francés, que é un tipo nado en Franza, que fala galego-castelán é do Celta e nacionalista galego.

Cousas das cañas

Thu, 28 Sep 2006 11:28:54 GMT

Resaca

Ola xente! Ando con dor de cabeza e bebendo auga como se se me fose a vida nelo! XDDD

O caso é que onte me chamaron para ir vé-lo partido do Barça a un bar e tomar unhas cañas (que en realidade o que máis me interesaba eran as cañas, hehe) e así comezou a noite. E veña cañas e veña pinchos e rematou o partido... pero no canto de voltar á casa fumos dar unha volta... outro bar, máis cañas e máis pinchos... logo a un pub no que non existe o garrafón a mandarlle un par de cubatas... e rematamos nun bar, tomando máis cañas, con música de Lamatumbá ¡¡Lume!!

Así que hoxe non estou en condicións óptimas e á tarde non vou estar, de xeito que tiña pensado pasar de escribir. Pero non sei qué carallo pasou onte que hai unha chea de novas para contar... así que ahí vos van! ;)

Ribadavia retrocede 600 anos

Fri, 25 Aug 2006 16:56:18 GMT

Festa da Istoria

En Ribadavia a historia escrébese sen h. En Ribadavia a moeda oficial é o maravedí e o último referente en moda o século XV.

Porque chega o día grande da Festa da Istoria, que un ano máis irrumpe no verán galego sen teren acadado o seu obxectivo máis ambicioso: pechá-lo pobo a quen non vaia debidamente vestido. "Non disfrazado, que isto non é un baile de disfraces", din os máis puristas, como Xosé Ramón Estévez, do Centro de Estudos Medievais de Ribadavia. Como el, son moitos os habitantes de O Ribeiro que se toman moi en serio esta celebración, unha das máis respetuosas coa época que representa. "Por iso non ten senso que apareza xente vestida de paiaso ou de Napoleón", queixase Estévez, que sitúa a primeira orixe documentada da Istoria no ano 1693 e que confesa unha sensación agridoce coa competencia doutras festas medieváis: "É un orguio que nos imiten, pero está todo un pouco desvirtuado". Críticas aparte, ofrece consellos aos visitantes: que admiren o patrimonio arquitectónico, que se enchoupen da historia medieval, que acodan vestidos de época e, por suposto, que coman e beban viño de O Ribeiro.

Os organizadores apelan á participación dos visitantes, pedíndolles que vaian vestidos de época. Para manté-lo rigor histórico quedan vetados os plásticos, os reloxos e tódolos elementos que non circulasen na Idade Media.

Presenza xudía: Convivencia exemplar

Pra que nun pobo se construíse unha sinagoga era obrigado que nel vivíran polo menos dez cabezas de familia xudías. En Ribadavia houbo como mínimo 500 xudeus, máis dun cuarto da poboación. A convivencia era exemplar, e proba delo é que a administración dos bens dos señores de Ribadavia estaba en mans de xudeus.

Dito ou lenda, cóntase que, unha vez consumada a súa expulsión de España, os que ficaron en Ribadavia falsamente conversos ó cristianismo se reunían cada sábado pra maltratar unha imaxe de Cristo crucificado.

A escenificación da boda xudía é un dos actos máis agardados cada ano na Istoria.

Os templarios: Un asentamento en Beade

O asentamento templario en Beade formouse darredor dos viñedos da zona, nunha época na que o viño era o motor económico indiscutíbel da comarca. No 1164, o fuero municipal da vila de Ribadavia autorizaba prezos libres e, séculos despóis, no 1575, unha pragmática de Felipe II permitía o seu comercio e exportación. O período de guerra entre Pedro I e Henrique de Trastámara, época na que se producíu a toma de Ribadavia, fixo que o viño de O Ribeiro se fixese célebre en toda Inglaterra. A caída da venda e exportación chegou unha vez superada a Idade Media, có incremento dos custos de transporte.

A Inquisición: Familias ligadas ó Santo Oficio

A existencia dunha Casa da Inquisición en Ribadavia ten sinxela explicación. Un familiar -así se chamaba aos representantes da Santa Inquisición en Galiza- ocupóu a vivenda, de orixe gótico, e colocou nela o seu escudo. A Festa da Istoria lembra, ano sí, ano non, un triste episodio daquela época coa representación de O Malsín, onde un veciño de Ribadavia denuncia á súa familia por xudaizantes, o que fai intervir á Inquisición. Comprobándose posteriormente a falsedade dos testimonios, o resto dos veciños mata ó acusador e a Inquisición declárao herexe.

Castelo dos Sarmiento: Entrada restrinxida ós vestidos de época

Construído na segunda metade do século XV, foi cedido por Henrique II a don Pedro Ruiz Sarmiento, noble galego que pasou despois a ser conde de Ribadavia e cuios descendentes o habitaron até o século XVII. Pese ó seu mal estado, o castelo conserva unha necrópole de pedra do século IX-XII e un sepulcro do XII. Faltan as almenas, a torre da homenaxe e calquera símbolo de protección. Durante a Festa da Istoria só se permite a entrada no castelo ás persoas convintemente vestidas.

Pra máis informazón: http://www.festadaistoria.com/noticias/index.php

A Fraga expres

Tue, 25 Jul 2006 23:28:12 GMT

Fraga, fragueando, fragueiro, fraguil

¡¡Eeeiiiiii carballeiraaaaa!! Velaquí o Susiño. Tras chegar da fraguiña e pegarme un duchazo aquí estou. Vou ser breve que teño que durmir pra ir traballar.

Menos mal que isto é escrito, que estou afónico de todo de cantar a cabritiña de seguido durante tres días.

Cousas que descubrín nesta Fraga 2006:

- Teño un aguante que nin Deus. Menos mal que durmin esa sesta que me soubo como leite doce, mais ahí fico en pé... non hai viño que me deite XD

- Son un gran Mestre de Cerimonias nas Queimadas. Ninguén me fixo caso, pero saíume boa de carallo.

- O Susiño é toda unha persoaxe. Maneiras de saudarme a xente... hai que toliño que vos estou... Sempre metido onde haxa festa e até os de Lamatumbá fliparon comigo. Un deles fixo o meu xa famoso (alomenos hoxe foino) baile da Cabritiña, outro non facia máis que mirarme con cara de "este non pode ser ben da cabeza" e outro puxo a miña garabata XD

- O meu look fragueiro triunfa. A barba de catro días (como eu xa pensaba) quédame caralluda e dame un toque interesante digno de teren moi en conta. Creo que "liguei" máis agora en tres días que en todo o ano XD

- É preciso inventar o bocadillo de Lacón con Grelos (isto confirmouse... descubrino o sábado)

- Mmmmmmmmm.... chiquitillas chiqutillas... Mmmmmm...

- ¡¡A cabritiña, a cabritiña, a cabritiña cabritiña cabritiña!!

- ¡¡¡Pillei unha tallada como un can-codriloooooo!!! XD

- Adriana mola moito. E Pontevedra está fichado... ¡¡A Lauriña é a hostia!! ;)

- ¡Que viva Roupar! E mira que mola máis o Darriba, pero no Dabaixo haivos moi boa xente... ¡eh Vickiña! ;)

P.D.- A ver Vickiña... ¿onde carallo te metiches? Mesmo estiven a buscar á tua irmá pero non atopei a súa cabana... logo vinme pra a casa e aquí estou...

Non queda nada pra a festa da Fraga

Sat, 22 Jul 2006 12:14:31 GMT

A Festa da Fraga despega co festival Nabiza Rock

O certame traerá mañá ás Pontes á Fundación Tony Manero

O luns actuará Berrogüetto, mentres que o martes será o día da romaría

Preparados, listos, xa. A Festa da Fraga das Pontes, unha das citas máis esperadas pola mocidade e os ponteses de toda a vida -inclúe unha romaría que cumpre 102 anos, declarada festa de interese turístico-, despega mañá domingo cun completo menú de tres días de música rock e folk, a gusto de todos os consumidores. Todo ao aire libre e gratuíto.

A festa estrearase mañá co festival Nabiza Rock, que comezará ás dez e media da noite e que incluirá as actuacións de Pal Keli, Fundación Tony Manero, AK 47, Dr. Funkstein e Ogmios. O luns será o recuncho da música folk, que chegará á Fraga da man de Berrogüetto, A Bottine Souriante e Muxarega. Estes concertos comezarán tamén ás dez e media da noite.

O martes 25, día de Santiago, será tempo de romaría e de festa rachada durante a sesión vermú. Ése é o momento culminante da xornada, cando a orquestra empeza a tocar as pezas do mediodía. Unha multitude enfervorizada, incapaz de deixar de brincar e brincar, lánzase de cabeza ao río para quitarse o barro co que previamente se embardunan o corpo.

Esa é a parte da romaría reservada para a mocidade disposta a todo. A outra, a que se leva facendo desde fai 102 anos, consiste en acudir a misa de doce á capela do Carmen (no centro do pobo) e merendar pola tarde sentados á sombra das árbores centenarias do parque da Fraga, bailar unhas pezas ao son da charanga Os Ponteses, do grupo Lamatumbá e, pola noite, moverse ao ritmo da orquestra América S.L.

Así son os tres días últimos de festa cos que As Pontes despide unhas movidas celebracións patronais do Carme.

Cambio de escenario

Este ano, estas xornadas finais chegan cunha novidade: por primeira vez, os concertos e a sesión vermú do 25 realizaranse fóra do recinto do parque antigo para preservar o campo e as árbores antigas. Desde mañá, todo discorrerá fóra, aínda que moi preto do lugar de sempre.

Grandes concertos polas festas de As Pontes

Tue, 18 Jul 2006 13:47:06 GMT

O concerto do domingo da Oreja de Van Gogh bateu marcas de asistencia de espectadores

Hixinio Adega, o concelleiro de Cultura das Pontes e membro da comisión de festas do Carmen , mostrouse onte máis que satisfeito coas cifras de público obtidas o sábado e o domingo cos concertos do Soño de Morfeo e A Oreja de Van Gogh. Segundo datos facilitados por Adega onte mesmo, cumpríronse as expectativas e asistiron aos recitais máis de 60.000 persoas entre os dous recitais.

O máis multitudinario foi, segundo o concelleiro, o da Oreja de Van Gogh, ao que asistiron 50.000 espectadores. Outras fontes rebaixan de forma considerable esta cifra.

Arriva informou de que os autobuses especiais fretados tanto o sábado como o domingo con saídas desde Ferrol, Pontedeume e A Coruña transportaron ao redor de 250 persoas entre os dous días.

Adega destacou a ausencia de incidentes durante o fin de semana. O domingo despregouse un dispositivo especial de seguridade no que participaron sete axentes da Garda Civil das Pontes, Fene e Ortigueira; catro parellas da Garda Civil de Tráfico de Ferrol, máis o equipo de ateigados e o coche radar de control de velocidade. Datos facilitados polo instituto armado, revelan que o domingo se efectuaron ao redor de oitenta probas de alcoholemia, das cales tres deron positivas.

A Policía Local destacou o domingo a tres axentes de forma excepcional. Este verán, por mor das vacacións e as baixas médicas, traballa un único policía por quenda.

O alcalde, Víctor Guerreiro, tamén se mostrou satisfeito co resultado dos concertos e destacou que grazas a subvencións do Xacobeo e de Turismo este ano gastarán menos nas festas.

¡Treme As Pontes!

Sun, 16 Jul 2006 12:26:44 GMT

A Oreja de Van Gogh ofrece o seu único concerto de entrada gratuíta

As Pontes O grupo actuará no campo de rugby a partir das once desta noite

O Concello habilita como zonas de aparcadoiro Os Airíos e A Balsa

A Oreja de Van Gogh ofrece esta noite nas Pontes -campo de rugby a partir das once- o seu único concerto en toda España que será de entrada gratuíta. O grupo capitaneado pola cantante Amaia Montero tomará así a testemuña do Soño de Morfeo, que tiña previsto actuar onte á noite na praza do Carme ante unhas dez mil persoas.

A organización, o Concello pontés, prevé que A Oreja de Van Gogh atraia a cinco veces máis espectadores, por iso é polo que os preparativos para facilitar o acceso á vila e garantir a seguridade do público sexan excepcionais, nunca vistas ata o momento.

Para empezar, o Concello aconsella aos afeccionados que cheguen ás Pontes en coche particular que aparquen no polígono industrial dos Airíos e na zona da Balsa. Alí atoparanse cun servizo de transporte gratuíto, a partir das seis da tarde, que os achegará á estación de autobuses, situada moi preto do campo de rugby. Cando conclúa o concerto, sobre a unha da madrugada, os autobuses realizarán o percorrido en sentido inverso.

Ademais, como onte, Arriva pon a disposición dos viaxeiros autobuses especiais en dirección ás Pontes. ás nove da noite sairán das estacións de Ferrol e A Coruña, e ás 21.30 de Pontedeume. O regreso efectuarase ás dúas da mañá desde os institutos das Pontes (están xuntos e próximos ao lugar do concerto). Os billetes, de ida e volta, custarán 4,5 euros desde Pontedeume; 6,5 desde Ferrol e 10 euros desde A Coruña.

En canto á seguridade, o Concello pontés contratou a unha compañía privada para vixiar a celebración do concerto nos arredores do escenario. Ademais, traballarán na organización a Policía Local das Pontes, Protección Civil, Grupo de Intervención Rápida e Garda Civil, que recibirá reforzos doutros cuarteis da comarca. Os axentes de Tráfico estarán tamén presentes nas estradas de acceso á vila mineira.