Aires da miña Terra: Deportes

O partido en detalles

Fri, 29 Dec 2006 12:13:29 GMT

Galiza 1 - 1 Ecuador

Malia o curto do resultado, Galiza e Ecuador ofreceron un intenso encontro cheo de ocasións e bo fútbol. O central Calle adiantou os americanos cun maxistral lanzamento de falta mediada a segunda metade. Minutos despois Jonathan Pereira estabelecía o empate no marcador logo de culminar unha boa xogada persoal de Diego Castro pola banda dereita. Galiza dominou o xogo durante boa parte do encontro pero as ocasións repartíronse por igual para ambos equipos.

A selección galega debuxou sobre o terreo de xogo un clásico 4-2-3-1 durante os noventa minutos. López comezou na portería. Barragán, Rubén, Noguerol e Fuentes formaron a defensa. No mediocentro, Viqueira e Borja. O ataque estivo formado por Julio Álvarez na banda dereita, Nano na esquerda, Trashorras na media punta e Couñago como nove.

Pola súa parte os ecuatorianos presentaron unha forte aposta atacante cun 4-1-2-3 semellante ao do Barcelona de Rijkaard. Aragón estivo na porta. A defensa estivo formada por Montaño, Calle, Perlaza e Ambrosi. Ayori distribuíu o xogo deixando no ataque a Quiñonez e Quiroz polo centro. Completou o once un tridente ofensivo formado por Zura, Saritama e Noboa.

O primeiro tempo comezou cun claro dominio do cadro local. Trashorras e Viqueira foron os máis activos e levaron o peso do ataque galego polo centro. As bandas estiveron pouco activas nos primeiros minutos pero pouco a pouco foron tomando protagonismo, sobre todo Julio Álvarez que combinou á perfección con Barragán. As ocasións galegas comezaron a chegar pero foron os ecuatorianos os que deron os primeiros sustos á bancada de Riazor. Diego López tivo que empregarse a fondo en dúas claras ocasións evitando o gol visitante. Aínda así, a tripleta atacante ecuatoriana apenas logrou enlazar máis dun pase seguido, grazas en parte a boa actuación dos dous centrais galegos.

Pasaba a media hora cando unha mancadura no xeonllo obrigou a Pablo Couñago a deixarlle o seu posto no terreo de xogo ao chino Losada, que mostrouse moi activo e loitador durante todo o encontro. O partido chegou ao descanso con cero a cero no marcador pero coa sensación de que en calquera momento podían chegar os goles.

Na segunda metade Roberto ocupou o posto de Diego López na portería. Trashorras foi substituído por Jonathan Pereira, Julio Álvarez por Diego Castro e Nano por Iago. No cadro ecuatoriano Caicedo entrou por Quiñónez estabelecendo así un clásico 4-2-3-1.

O xogador do Villarreal Jonathan Pereira foi un dos máis activos no segundo tempo. Ocupou a mediapunta e trocou a súa posición con Diego Castro en numerosas ocasións. Malia que o dominio galego continuaba nos segundos corenta e cinco minutos foron os ecuatorianos os que inauguraron o marcador. O central Calle botou maxistralmente unha falta desde a frontal da area que se colou pola escuadra galega.

Corría o minuto 20 de segundo tempo e foi entón cando a bancada animou con máis forza os galegos. O conxunto dirixido por Vázquez e Arsenio, lonxe de perder o control do xogo, fíxose outra vez co dominio do esférico e continuou a asexar a meta defendida por Aragón. Foi entón cando chegou o empate da man de Pereira, que aproveitou un rexeite do meta ecuatoriano logo dunha gran xogada persoal de Diego Castro pola banda dereita.

Fuentes e Jonathan Vila entraron no último tramo do encontro na procura do triunfo para Galiza. Porén, a defensa ecuatoriana, malia a ausencia de Hurtado, mostrouse moi seria nos últimos minutos ante as acometidas galegas. Deste xeito, coa nosa selección turrando no ataque chegouse até o minuto 90.

Logo do visto sobre o terreo de xogo o resultado ben parece curto. Os dous equipos fixeron méritos para levar a vitoria, se cadra, Galiza un pouquiño máis, pero xa se sabe como é isto do fútbol.

19:30: Os xogadores galegos examinan o estado do céspede de Riazor e intercambian impresións sobre o estadio coruñés.

20:20: Riazor abre as súas portas. Os seareiros máis madrugadores comezan a ocupar os seus postos nas bancadas.

20:55: Os xogadores saltan ao terreo de xogo. Procedese a escoitar os himnos de Ecuador e Galiza.

21:10: Comeza o encontro.

21:11: Falta contra Couñago no bordo da área ecuatoriana.

21:12: Rexeitado o lanzamento de Viqueira.

21:16: Córner sacado por Quiroz. Parada de Diego López.

21:18: Remate de Borja. Fóra.

21:20: Falta de Quiroz sobre Trashorras. Saca Viqueira. Despexado pola defensa ecuatoriana.

21:22: Aragón frustra nova ocasión de gol galega.

21:25: Trashorras falla lanzamento directo.

21:26: Remate de Pablo Couñago tras centro de Trashorras vai fóra. Primeira oportunidade de gol galega.

21:29: Pablo Couñago sofre unha lesión no xeonllo. Troco: Sae Couñago, entra Losada.

21:31: Nano falla lanzamento a portaría. Demasiado alto.

21:33: Falta de Fuentes sobre Noboa.

21:35: Trashorras falla por moi pouco unha ocasión de gol. Vaselina sobre Aragón.

21:37: Diego López detén un lanzamento de Ecuador.

21:39: Viqueira saca falta. Losada forza córner.

21:40: Nano falla lanzamento a portaría. O balón foi demasiado alto.

21:42: Falta de Nano sobre Montaño.

21:44: Cartón amarelo a Calle por unha entrada sobre Trashorras.

21:46: Falta de Álvarez sobre Perlaza.

21:47: Falta de Barragán preto da área galega.

21:48: A barreira galega detén o saque de Quiroz.

21:49: Cartón amarelo a Quiñónez por falta contra Barragán.

21:50: Nova tentativa de gol de Trashorras. Fóra.

21:51: Fóra de xogo de Losada en acción de ataque galega.

21:53: Diego López para centro de Saritama.

21:55: Aragón para centro de Barragán. Un minuto de desconto. Falta de Barragán sobre Noboa.

21:56: Fin do primeiro tempo.

22:14: Comeza a segunda metade.

22:15: Primeira acción de ataque de Ecuador. Quiroz falla lanzamento de falta.

22:16: Centro de Iago fallado por Losada.

22:17: Aragón para lanzamento a meta de Losada.

22:22: O xogo continúa polo centro do campo.

22:23: Saque de banda de Manuel Castiñeiras.

22:24: Fóra de xogo de Losada.

22:25: Nova oportunidade de Galiza. Diego Castro ve rexeitado o seu lanzamento.

22:26: Vaselina de Viqueira ás mans de Aragón.

22:27: Golpe entre Borja e Saritama. Os dous saen do campo.

22:29: Rubén González frea o ataque de Ecuador. Entra Borja.

22:30: Losada cae dentro da área. Non hai penalti.

22:31: Cartón amarelo para Rubén.

22:32: GOL DE ECUADOR Marca Calle no saque da falta.

22:36: GOL DE JONATHAN PEREIRA. Empata a selección de Galiza.

22:40: Pereira vólvese achegar á meta ecuatoriana. Fóra de xogo.

22:40: Troco: Entra De Jesús, sae Noboa.

22:43: Falta contra Pereira.

22:47: Troco: Sae Calle, entra Ayovi.

22:48: Iago falla lanzamento directo á portaría.

22:51:Borja saca falta. Losada falla remate a porta.

22:53:Quiroz falla lanzamento a meta.

22:55: Diego Castro sae por un golpe. Volve entrar.

22:58: Falta de Montaño sobre Borja.

22:59: Diego Castro falla lanzamento. Tres minutos de desconto.

23:00: Aragón chapa lanzamento de Diego.

23:01: Cartón amarelo para Manuel.

23:02: Cae unha bengala sobre o campo.

23:02: Roberto para lanzamento de Quiroz. Final do partido.

Galiza-Ecuador

Fri, 29 Dec 2006 01:59:13 GMT

Galiza 1-1 Ecuador

Que magoa!

Tue, 26 Dec 2006 17:37:32 GMT

Jelena Dokic operarase o peito para xogar mellor

A tenista serbia Jelena Dokic desexa someterse a unha intervención para reducir o tamaño dos seus seos, segundo a información publicada na páxina web da xogadora.

O motivo de tal decisión é que o tamaño do peito impídelle a Dokic xogar ao tenis como ela desexa.

Non sei vós... pero eu penso que non lle sobra nada, nin tampouco precisa de nada máis, non si? :)_

A seleción galega de Taekwondo no berce deste deporte

Mon, 11 Dec 2006 19:44:52 GMT

A seleción galega de taekwondo concéntrase en Corea do Sur

Este sábado 9 de decembro partiron cara a Corea do Sur os integrantes da seleción galega de taekwondo. Os deportistas galegos adestrarán e competirán no país asiático até o próximo día 22. O plan de traballo, patrocinado pola Fundación Deporte Galego, estabelece un día de adestramento na universidade coreana de Kyung Hi así como a participación nunha competición internacional en Chang Won Do, onde se atopa unha escola superior deste modalidade. Deste xeito, o combinado galego medirase cos equipos coreanos e con deportistas de diversos países, que contan con axudas da Federación Internacional (WTF) a través dun programa de desenvolvemento do taekwondo de alto nivel no mundo.

A delegación galega está integrada por oito deportistas, de entre 17 e 21 anos, dous técnicos e un xefe de equipo, o mestre coreano Lee Dong Kyu. A súa viaxe comezou o sábado 9, ás 15.40 no aeroporto de Alvedro, e rematará o vindeiro día 22.

Integrantes da Seleción Galega:

Menos 54 quilos:

Pablo Carou (Club Maniotas Noia)
Daniel Mallo (Maths Marín): campión de España

Menos 58:

Erik Benito (Athenas de Vigo): campión de España en todas as categorías
Bruno García (Bellas-Quim): campión iúnior, universitario e bronce no campionato do mundo universitario

Menos 62:
Manuel Barros (Mace-Sport Pontevedra): campión de España iúnior.

Menos 67:
Xosé Fernández Rey (Natural de Sada): subcampión de España cadete e iúnior.

Menos de 72 quilos:
Raúl Bouzas Somoza (Olimpic de Vilagarcía): campión de España cadete e iúnior, dúas veces en cada modalidade.

Menos de 78 quilos:
Fernando Rascado Ríos (Tao de Vigo): Subcmapión de España cadete e iúnior, dúas veces de cada modalidade.

Selecionadores: Xosé Luis Álvarez Baptistas e Xoán Luís Martínez Queiruga.

Poñense en venda as entradas pra o partido da Seleción Galega

Fri, 01 Dec 2006 20:41:55 GMT

As entradas para o Galiza–Ecuador estarán á venda a partir do 18 de decembro

A conselleira de Cultura e Deporte, Ánxela Bugallo, presentou no mediodía do xoves o partido que desputará a selección galega de fútbol ante Ecuador o vindeiro 28 de decembro. No acto de presentación, o Director Xeral para o Deporte, Santiago Domínguez adiantou que dende este venres os grupos xa poderán reservar os seus tíckets para o agardado choque. A venda de entradas xerais comezará o 18 de decembro a través do servizo de venda de localidades de Caixanova e nas billeteiras de Riazor.

O acto contou coa presenza de representantes das tres entidades patrocinadoras: Luis Vela Alarcó, director territorial de Caixanova, Antonio Viejo, director de márketing de Estrella Galicia, e Antonio Cortés, director de Comunicación de Gadisa. Tamén estiveron o vogal da xunta xestora da Federación Galega de Fútbol, o concelleiro de Deportes, Esteban Lareo, e o vicepresidente do Deportivo, Francisco Dopico.

A conselleira non ocultou a súa ledicia por ter elixido á Coruña como sede do encontro: "é a mellor fórmula para colaborar co Centenario do Dépor, xa que así rendemos homenaxe a un club que logrou os mellores éxitos deportivos".

Pola súa parte, Santiago Domínguez agradeceu a colaboración do concello da Coruña, do Deportivo e dos patrocinadores, que "están a facer un esforzo enorme non só a nivel de patrocinio: Caixanova venderá entradas, Gadisa fará unha promoción entre os seus clientes, e Estrella Galicia colaborará coas categorías base das seleccións galegas".

Ao mesmo tempo, o director xeral para o Deporte, anunciou que xa iniciaron os contactos co consulado de Ecuador en Galiza e algunha asociación do país americano para que os afeccionados ecuatorianos formen parte activa tamén desta "gran festa do deporte galego".

Entradas
As localidades divídense en tres categorías dependendo da situación da grada. A entrada aos Fondos e a Preferencia inferior custará 8 euros, Preferencia Superior 10 e Tribuna 15.

Dende hoxe os grupos (dez ou máis persoas) que desexen asistir ao partido xa poden reservá-las súas entradas para o encontro. A Fundación Deporte Galego habilitou o teléfono 902 905 051 (de 9 a 14h.) para este fin. As reservas tamén se poderán realizar por internet na web da Dirección Xeral para o Deporte. O prazo para a reserva de localidades a grupos remata o xoves 14 de decembro.

Dependendo da cantidade de entradas solicitadas os grupos recibirán un determinado número de invitacións. Un dez por cento se se solicitan entre 50 e 300 e un vinte por cento a partir das 300. Os máis cativos tamén están convidados a presenciar o encontro, por iso, a tódolos clubes que fagan reserva de entradas para grupos, daránselles, ademais, 10 invitacións para rapaces e rapazas de até 16 anos.

As localidades para o público en xeral poranse á venda o 18 de decembro a través do servizo electrónico de venda de localidades de Caixanova.

O proxecto do equipo de ciclismo galego avanza

Fri, 24 Nov 2006 23:04:24 GMT

Marcos Serrano será o xefe de filas do Karpin Galicia

Marcos Serrano (Redondela, 1972) xa é a gran referencia do Karpin Galicia. Tal e como recoñeceu o propio corredor, chega ao equipo coa intención de liderar o proxecto galego e axudar a conseguir os primeiros éxitos da súa andaina.

Esta será a súa décimo quinta tempada como profesional, categoría na que debutou no 93 co Kelme. Desde o 1999 até o 2003 foi corredor da ONCE para logo fichar polo Liberty Seguros/Astana-Würth. No seu palmarés destaca a súa vitoria na décimo oitava tirada do Tour do 2005, e os triunfos na Milán-Turín(2004), Volta a Castela e León (2001) e na Volta a Galiza do 1999.

O director xeral para o Deporte e membro da Fundación Ciclismo Galego, Santiago Domínguez, acudiu á presentación do corredor e sinalou que Marcos Serrano "é o mellor ciclista que poderíamos ter no equipo". Domínguez destacou a implicación do deportista nun proxecto no que "turrou" forte e amosou a súa satisfacción por contar cun "gran corredor como abandeirado do equipo".

Pola súa parte, Valery Karpin adiantou os dous nomes que faltan para pechar de momento o equipo. "Xa temos a catorce corredores presentados ante a UCI. Eduard Vorganov xa está firmado. Hoxe asinamos con Marcos e están as negociacións moi avanzadas con Eladio Jiménez. Queda unha praza libre, e Álvaro decidirá cando e con quen a pechamos". O presidente da Fundación Ciclismo Galego sinalou xaneiro como data de comezo da actividade do equipo e a Volta a Mallorca en febreiro como primeira cita coa competición.

Dépor - Celta

Fri, 17 Nov 2006 22:32:12 GMT

O derbi máis galego dos últimos tempos

Deportivo e Celta xogarán esta fin de semana o primeiro derbi galego da tempada na primeira división. Lonxe quedan xa aqueles choques nos que só o capitán deportivista Fran representaba o fútbol autóctono, en parte, porque as numerosas lesións que está a sufrir o Celta obrigan a Fernando Vázquez a convocar a catro canteiráns. Deste xeito, este domingo en Riazor até sete xogadores nados en Galiza poderían participar no derbi: Iago e Barragán polo Dépor e Oubiña, Jonathan e Iago Aspas, Dani Abalo e Jonathan Vila por parte do cadro vigués.

O encontro comezará ás 21:00 horas e será retransmitido en directo por Canal Plus. De momento, a presenza de afeccionados celestes na bancada de Riazor está garantida malia que non se agarda unha afluencia masiva como o ano pasado por mor do horario.

E eu estarei a velo dende o asento 97 do fondo norte!!!! hehehe

OPA DEPOR!!!